Чỹк уйăхĕн 16-мĕшĕнче чăвашсен мухтавлă сăвăçи Çеçпĕл Мишши çуралнăранпа 120 çул çитет. Вăхăт самаях хыçа юлчĕ пулин те, унăн хайлавĕсем паян та уççăн янăраççĕ. Çакă Трак енре районти тĕп вулавăш йĕркелесе ирттернĕ "Çеçпĕл вулавĕсем" пынă чухне те (чỹк уйăхĕн 11-16-мĕшĕсем) аван сисĕнчĕ. Ун вăхăтĕнче районти тĕп вулавăшăн ĕçченĕ С. Гурьева тата районти историпе таврапĕлỹ халăх музейĕн ертỹçи В. Тихонова Трак вăтам шкулĕнчи 7 "а", 8 "а", 10 "а" тата 10 "б", çавăн пекех Красноармейски шкулĕнчи 9-мĕш классенче вĕренекенсемпе "Хĕвеллĕ пурнăç юрăçи" темăпа калаçусем йĕркелерĕç. Ачасем вĕсене интересленсе итлерĕç, кăвар чĕреллĕ поэтăмăрăн кĕске, анчах та пултарулăхран тухăçлă кун-çулĕпе туллин паллашрĕç. Чỹк уйăхĕн 13-мĕшĕнчи кăнтăрла иртсен вара вĕсем районти тĕп вулавăш çумĕнче йĕркеленĕ "Тимлĕх" клуб членĕсем умĕнче тухса каларĕç. Аслă ăру çыннисемпе районти тĕп библиотекăн вулав залĕнче пулса иртнĕ тĕлпулăва вулавăш ĕçченĕ С. Гурьева уçса йĕркелесе пычĕ. Светлана Аверкиевна пухăннисене, компьютер технологийĕпе усă курса, хăй хатĕрленĕ "Çеçпĕл Мишши: Поэт пурнăçĕ. Поэт сасси" электронлă презентаципе паллаштарчĕ, хастар сăвăç çинчен нумай ăшă сăмахсем каларĕ. Сăмах май, библиотекăра тăрăшакансем Çеçпĕл Мишши кĕнекисен куравне те йĕркеленĕ, унта чăваш халăхĕн чăн-чăн патриочĕн 1928 çулта пичетленсе тухнă кĕнеки те пурччĕ. Профессийĕпе педагог пулнă тата пысăк тĕпчев ĕçĕсем ирттернĕ май, хĕрỹ те таса чунлă сăвăç кун-çулĕ çинчен районти историпе таврапĕлỹ халăх музейĕн ертỹçи В. Тихонова туллин каласа пачĕ. Валентина Аркадьевна Çеçпĕл Мишшин амăшĕ — Агафия Николаевна Николаева пирĕн ентеш пулнине, Шывпуç Чуракасси ялĕнчи вăтам хресчен кил-йышĕнче çуралса 91 çула çитиччен пурăннине палăртрĕ. Сăмах май, вăл ун пирки районти "Ял пурнăçĕ" хаçатăн кăçалхи чỹк уйăхĕн 8-мĕшĕнчи 82-мĕш номерĕнче пичетленнĕ "Çеçпĕл Мишши амăшĕ Шывпуç Чуракасси ялĕнчен" статьяра та каласа панă. Валентина Аркадьевна, Çеçпĕл Мишшинни евĕрех, унăн амăшĕн çутă сăнарĕ те халăхăмăр асĕнче ĕмĕр-ĕмĕрех упранасса шанса тăнине палăртрĕ. Ларура çавăн пекех Красноармейскинче пурăнакан С. Мефодьева тата "Раççей пенсио- нерĕсен Пĕрлĕхĕ" общество организацийĕн районти уйрăмĕн ертỹçи А. Дмитриева тухса каларĕç, чăвашсен сумлă поэчĕн Çеçпĕл Мишшин пултарулăхри ĕçĕ-хĕлĕ яланлăхах çутă тата тарăн йĕр хăварасса шаннине пĕлтерчĕç. В. Данилов, Т. Филиппова.