— Район тантăшĕ эпĕ, — теме пултарать хăйне Анатри Типçырмара пурăнакан Феврония Ивановна. Çапла, çут тĕнчене вăл 1935 çулхи юпа уйăхĕн пиллĕкмĕшĕнче килнĕ. Паянхи кунчченех хăй кун-çулне тăван ялта йĕркелесе пырать. “Пĕтĕм пурнăçне çуралнă кĕтесне, ял хуçалăхне халалланă”, — тесе калама пулать унашкаллисем пирки. Ф. Иванова, чăваш пурнăçĕн йĕркипе, пĕчĕклех ашшĕ-амăшне килти, каярахпа бригадăри ĕçсене тума пулăшнă: çум çумланă, выльăх-чĕрлĕх пăхнă, тырă вырнă, утă çулнă... Çамрăклăхăн пĕр тапхăрне кăна тăван ялтан аякра ирттернĕ Анатри Типçырма хĕрĕ. Укçа-тенкĕ ĕçлесе илес тĕллевпе Челябинск облаçĕнчи Миасс хулинчи машинăсем тăвакан завод стройкине ăсаннă чăваш яш-кĕрĕмĕ ун чухне. Районти ĕçпе тивĕçтерекен уйрăмпа килĕшỹ тунă та — тĕнче курма çула тухнă. Унтан таврăнсан пĕр вăхăт почтальонкăра тăрăшнă. Ватăрах çын та ĕçлеме пултаракан професси тивĕçтереймен-ха вăр-вар хĕр чунне. Ф. Иванова Вологда облаçĕнче дояркăсем кирлĕ тенĕ хыпара илтет, унта çул тытать. 1958—1964 çулсенче “Шуйский” совхозра чунне парса вăй хурать Хеврунь. Ахаль мар ĕнтĕ облаçри дояркăсем хушшинчи социализмла ăмăртура пĕрремĕш вырăна тухать чăваш хĕрĕ, хисеплĕ ятпа хаклă парнене тивĕçет. — Кунсерен 13 ĕнерен алăпа суса 5 бидон паха сĕт ăсататтăм, — аса илчĕ çав тапхăра Ф. Иванова. Римма аппăшĕ йывăр чирлесе ỹкни йăмăкне тăван киле таврăнма хистенĕ. “Ик алла пĕр ĕç”, тенешкел, çав вăхăтрах Хеврунь Кушкăри фельдшер пунктне санитаркăна вырнаçать ỹркенмен хĕрарăм. Сисмесĕрех кунта ултă çул иртет. Кун-çулăн тивĕçлĕ канăвне тухас умĕнхи тапхăрне Феврония Ивановна тăван “Мичуринец” совхозра весовщицăра, каярахпа, алла тивĕçлĕ хут илсен, лаборанткăра вăй хурать. Тирпейлĕхе юратакан специалист ферма ĕçченĕсенчен выльăхсен сĕт сумалли аппаратсен тасалăхĕшĕн, продукци пахалăхĕшĕн çирĕп ыйтнă. Çакă хăш-пĕр çынсене килĕшмен-мĕн, Ф. Иванова пирки дирекцине, района çăхав çитернĕ. Пĕррехинче, сĕт леçме кайнă лаборант машини каçхи сăвăма çеç комплекса çитнĕ. “Ф. Иванова продукцине кирлĕ çĕре мар, урăх адреспа сутса вăхăта ирттернĕ...” Тепĕр куннех совхоз директорĕпе ял хуçалăх управленийĕн пуçлăхĕ лаборанткăпа пĕрле Канашри сĕт-çу заводне вĕçтереççĕ. Çăхавра палăртнă кун Шупашкарта шыв пулман пирки продукцие йышăнманни, Çĕрпỹри пунктра черет вăрăмми (сĕт йỹçсе каять!) Мăншетмĕсене Канаша кайма тивни çирĕпленет. — Тирпейлĕхпе тăрăшулăх, пĕрле вăй хуракансенчен çирĕп ыйтаслăх ăста специалистăн малти вырăнтаччĕ. Ахаль мар ĕнтĕ вăл лаборантра ĕçленĕ вăхăтра “Мичуринец” совхозран çулсеренех ăсаннă сĕтĕн 98 проценчĕ пĕрремĕш сортлă шутланатчĕ, — терĕ çав тапхăрта совхозри партком секретарĕ пулнă Иван Ильич Ильин. Тăрăшуллă лаборантка ĕçленĕ вăхăтра “Мичуринец” совхозран асăннă сĕтĕн 98 проценчĕ çулсеренех пĕрремĕш сортпа кайнă. Феврония Иванова — Мăн Шетмĕ тăрăхĕнчи хисеплĕ те авторитетлă ветеран. Хăй вăхăтĕнче ял канашĕн депутачĕ те пулнă. Халĕ те общество ĕçне хастар хутшăнать, ырă тĕслĕх кăтартать. Яла тирпей-илем кĕртес, çăл-колонка таврашне пăхса тăрас ĕçе те хăйĕн тивĕçĕ тесе шутлать вăл. 2016 çулта Анатри Типçырма ялĕнче Аттеллĕх вăрçине хутшăннă фронтовиксене асăнса палăк уçрĕç. Палăка Олег Трофимов каменщик тирпейлĕ купаланă. Ăна пулăшнă çĕрте Виктор Тимофеев, Федя Михайлов, Владимир Сверчков, Гаврил Михайлов, Виктор Владимиров, Анна Марковăпа Таня Назарова тата ыттисем палăрчĕç. Çак сăваплă ĕçе Ивановсен çемйи те хăй тỹпине хыврĕ. Болеславпа Галина, ывăлĕ Евгений, Викторпа Владимир пĕр тăвансем строительство материалĕсемпе тивĕçтерес енĕпе пуçарулăх кăтартрĕç. Сăмах май каласан, Феврония Ивановна пек канăçсăр чунлă çынсем Кушкă çăвин çуртне кăçал çĕнĕрен туса лартнă, кунта карта тытнă, çăва пуçĕн вырăнне тĕпрен çĕнтернĕ. Вĕсен ырă ĕçĕ яланах халăхра упрантăр. Çак кунсенче Анатри Типçырмари ят-сумлă Ф.И. Иванова хăйĕн черетлĕ çуралнă кунне паллă турĕ. Ăна ял-йыш ăшшăн саламласа вăрăм кун-çул сунчĕ.

В. Константинов.