Çур çулхи кăтартусем
Ларура комисси членĕсем пĕтĕмпе 3 ыйту пăхса тухрĕç, пуринпе те Раççей Потребнадзорĕн Чăваш Республикинчи Управленийĕн Çĕрпÿ районĕнчи территори пайĕн эксперт специалисчĕ Н. Васильева тухса каларĕ. Инфекцилле тата паразитарлă чир-чĕрпе кĕрешесси пирĕн районта кăçалхи 6 уйăхра мĕнле пулса пыни çинчен пĕлтернĕ май, Наталья Николаевна çакна палăртрĕ: ун евĕр 771 тĕслĕх шута илнĕ, пĕлтĕрхи çав вăхăтрипе танлаштарсан, вĕсем 1, 3 хут сахалланнă.
Роспотребнадзор Управленийĕн территори пайĕн специалисчĕсем “Звездочка”, “Сеспель” тата “Чебурашка” ача сачĕсенче вар-хырăм инфекцийĕ сарăлнин тĕслĕхĕсемпе, менингококк инфекцийĕн 1 тĕслĕхĕпе санитарипе эпидемиологи тĕпчевĕсем ирттернĕ, санитари законодательствине пăснăшăн должноçри 4 çынна административлă явап тыттарнă, тупса палăртнă çитменлĕхсене пĕтерме предписани панă.
Ларура ВИЧ-инфекци енĕпе лару-тăру епле пулнине те тишкернĕ. Пĕрремĕш çур çулта районта пурăнакансен 4, 6 процентне ВИЧ-инфекци енĕпе тĕрĕсленĕ. Ăна республикипе 92 çынра пуçласа тупса палăртнă, çав шутра 3-шĕ РФ урăх субăекчĕсенче пурăнакансем. ВИЧ-инфекцин çĕнĕ тĕслĕхĕсене муниципаллă 17 йĕркелÿре тупса палăртнă (пирĕн районта çук), вăл шутра Шупашкарта 32, Çĕнĕ Шупашкар, Канаш хулисемпе Шупашкар районĕнче — 5-шер.
Виççĕмĕш ыйтăва — иммунлă профилактика лару-тăрăвĕ пирки —пăхса тухнă май Н. Васильева районти халăха иммунизацилес ĕçе туллин ирттерменнине каларĕ. Çулталăкченхи ачасене инактивированнăй полиомиелит вакцинипе вакцинацилемелли плана ав 32, 2 процент кăна тултарнă, хĕрлĕ шатраран — 38, 5.
Уртаракан чиртен прививка тума районта пăхман. Çĕпĕр язвипе туляремирен те халăха прививкăсем туман.
Сÿтсе явнă ыйтусемпе комисси членĕсем тивĕçлĕ йышăнусем турĕç, санитарипе эпидемие хирĕçле лару-тăрăва лайăхлатассипе пурнăçланă ĕçсене çитес ларура тишкерме палăртрĕç.