Республикăри икĕ хуçалăхра Чăваш Енре 40 çул ытла пулман чире - выльăх бруцеллезне - тупни пирки эпир çырнăччĕ. Тупса палăртнă та хăрушлăх сирĕлнĕ теме иртерех иккен.

Аса илтерер: Красноармейски районĕнчи “Бахча” ОООра тата Шупашкар районĕнчи “Туруновский” хуçалăхра 200 пуç ытла выльăха пусма тивнĕччĕ. Россельхознадзор управленийĕн специалисчĕсен тĕпчевĕ бруцеллез кунта “Бахча” темиçе çул каялла Раççейĕн тĕрлĕ кĕтесĕнчен кÿнĕ сурăхсемпе килнĕ тесе шутлама май парать. “Туруновский” вара унтан сурăх ĕрчетме туяннă - чир Шупашкар районне те куçнă.

Шел те, бруцеллез хуçалăхсен выльăх картин тулашне те тухнă. Лаборатори тĕпчевĕсем çу уйăхĕнче Трак енри Алманч ялĕнче 2 сурăх чирленине çирĕплетнĕ, ака уйăхĕнче Кивĕ Йĕкĕт ялĕнчи уйрăм çыннăн икĕ ĕни тĕлĕшпе иккĕленÿ çуралнă. Ветслужба асăрхаттарнине пăхмасăр çавăн хыççăн хуçи ĕнесене паллă мар çынсене сутса янă. Россельхознадзор управленийĕн пай пуçлăхĕн çумĕ К.Викторов палăртнă тăрăх, хăрушлăх пур вырăнсенче ветеринарипе санитари мероприятийĕсем йĕркеленĕ, выльăха республикипех бруцеллез тĕлĕшпе тĕрĕслеççĕ. Хайхи чирлĕ пулнă тесе шутлакан ĕнесене кам туяннине тупса палăртас енĕпе те ĕçлеççĕ. Хăрушлăх пысăкки вара куç кĕрет: Роспотребнадзор управленийĕ çу уйăхĕнче бруцеллезпа чирленĕ çынна та тупса палăртнă. Вăл унччен “Туруновский” хуçалăхра хуралçăра ĕçленĕ-мĕн.