Красноармейскисен продукцине хуласенче ырлаççĕ
Декабрĕн 8-мĕшĕнче районти хуçалăхсен тата ял хуçалăх потребителĕсен кооперативĕсен ертÿçисем асăннă заводри цехсене кĕрсе курса вĕсен ĕçĕ-хĕлĕпе паллашрĕç, продукцие астивсе пăхрĕç, пысăк хак пачĕç. Александр Григорьевич каланă тăрăх, унччен вĕсем Мускавпа ĕçленĕ, халь çав çыхăнăва пăрахăçланă тата малашне хăйсен продукцине Чăваш Енре çеç вырнаçтарма тĕв тунă. Çавăнпа та вăл районти хуçалăхсемпе ял хуçалăх потребителĕсен кооперативĕсен ертÿçисене Красноармейски сĕт-çу завочĕпе тачă çыхăнса ĕçлеме ыйтрĕ, сĕтшĕн тÿлевне вăхăтра татса пыма пулчĕ. Виçĕ сехет ытла çак ыйтупа дискусси пычĕ. Ытларахăшĕ çитес вăхăтра харпăр хăй хуçалăхĕн сĕтне кунта ăсатма пулчĕ. Çапла туни Красноармейски сĕт-çу заводне тухăçлăрах ĕçлесе тупăш илме, район бюджетне ытларах укçа-тенкĕ илсе кĕме май парĕ. Ĕçлĕ тĕл пулăва район администрацийĕн ял хуçалăх пайĕн начальникĕ Ю.Петров йĕркелесе пычĕ тата Трак ен территорийĕнче туса илнĕ сĕте хамăр районти сĕт-çу заводнех ăсатмаллине пĕлтерчĕ.