Чăваш юманĕ ешертĕр
Кăçал 5 гектар çинчи юмансене — пуçласа, малтанхи 7 гектарĕ çинчине вара тепĕр хут сыпса тухнă. Кунсăр пуçне ку плантацирех çакăн пек ĕçсем туса ирттернĕ: шĕшкĕ хунавĕсене каснă — 11, 4 гектар, йывăçсен таврашĕнчи çĕре кăпкалатнă, çум курăксенчен тасатнă — 85, 8, утă çулнă — 18, сыпнă юман йывăççисен ÿсме чăрмантаракан йывăçсен хунавĕсене касса тухнă — 30, сыпнă юман йывăççисен чăрмантаракан тураттисене иртсе тата сыпнă туратсене сăрласа пăхса тăнă — 40 гектар çинче. Асăннă плантацири ĕçсене темиçе çул ĕнтĕ 6 хĕрарăм туса пырать. Акă вĕсем, Тури Анаткас ялĕнчи Е. И. Никитина, Пăрăнтăкри Р. И. Федорова, Йĕпремри Л. Г. Владимирова, Элĕк районĕнчи Анаткас Сурăмри Н. П. Ивановапа М. Б. Павлова, Е. В. Ильина. Асăннă хĕрарăмсемпе мĕн пур вăрман ĕçченĕсене хамăрăн професси уявĕ ячĕпе ăшшăн саламлатăп, ĕçре çитĕнÿ тума ырлăх-сывлăх сунатăп.
Ял ĕçченĕсемпе вăрмана юратакан çынсене хамăр юман плантацине пырса курма сĕнетĕп. Вăрмана сертене, кăмпана, мăйăра çÿреме кăмăллакансемпе канма каякансене кăвайт чĕртсен вут-кăварпа тата чĕлĕм туртнă чух асăрхануллă пулма ыйтатăп.