Милиционера хирĕç - кирпĕчпе
Влаç представительне хирĕç вăйпа yсă курнăшăн РФ Уголовнăй кодексĕнче штрафлама кăна мар, ирĕклĕхсĕр хăварма та палăртнă. Çак статья санкцийĕ çирĕп пулин те, граждансем тепĕр чух шутламасăр тунă утăм хăйсемшĕнех хакла ларассине асра тытмаççĕ.
КРАСНОАРМЕЙСКИ районĕн прокуратури шăпах çавнашкал пăтăрмаха тĕпченĕ. Следстви тĕпчесе пĕлнĕ тăрăх, пĕлтĕрхи çĕртме уйăхĕнче çĕрле милици сотрудникĕсем çемьере харкашу пуçарса арăмне хĕненĕ К.Степанова лăплантарма васканă. Лăплантарнă темелле. Ĕç-пyça тĕпчес, уçăмлатас тĕллевпе арçынна шалти ĕçсен пайне илсе каяс тенĕ, служба автомашинине кĕртсе лартнă. Анчах Степанова ку килĕшмен, милиционерсене вăл хăйĕн паттăрлăхне кăтартас тенĕ ахăр.
Арçын машинăран тухнă, кирпĕч катăкĕсем ярса тытнă та çывăхрах, икĕ метрта, тăракан милиционер-водителе тĕллесе пенĕ. Юрать-ха, формăллă çын пăрăнса ĕлкĕрнĕ, кирпĕч Красноармейски районĕн шалти ĕçсен пайĕн служба автомобильне лексе унăн кантăкне ватнă. Степанов çакăн хыççăн та лăпланман-ха, кирпĕч тытнăскер водитель çинеллех талпăннă, ăна вĕлерессипе хăратнă. Хăйĕншĕн чăннипех хăрушлăх пуррине кура, путсĕре чарас тĕллевпе, милиционер-водитель асăрхаттарнă хыççăн табель хĕç-пăшалĕнчен çÿлелле пенĕ. Çaвăн хыççăн преступник тарса пытаннă.
Çак тĕслĕхпе райпрокуратура РФ УК 318 статйин 1-мĕш пайĕпе /влаç представителĕ тĕлĕшпе вăйпа усă курни/ уголовнăй ĕç пуçарнă. Нумаях пулмасть приговор та палăртнă. Район сучĕ К.Степанова условнăй майпа 2 çуллăха ирĕклĕхсĕр хăварнă.