МЕДИЦИНА ĕçченĕсен кунĕ çывхарнă май Çĕмĕрле хулинче физкультурăпа спорт эрни иртнĕ. Унта республикăри çичĕ хулари сиплев учрежденийĕсенче вăй хуракансем хутшăннă. Кашниех харпăр хăй сывлăхĕшĕн яваплăха туйтăр, куллен тĕрлĕ  хускану туса ăна çирĕплетме ан ÿркентĕр, ытларах та ытларах çын спортпа туслаштăр - çак тĕллевпе йĕркеленĕ спартакиадăра Çĕмĕрлери ÿт чирĕсен диспансерĕн специалисчĕсем çĕнтернĕ.

Красноармейски сиплевçисем те кÿршĕ районти ĕçтешĕсенчен юлман. Спорт уявне хутшăннă хĕрарăмсен хушшинче Мăн Шетмĕ больницин лаборантки У.Герасимова финиша пĕрремĕш чупса çитнĕ. Трак тăрăхĕнчи тĕп больницăра тăрăшакан В.Перепелкин арçынсен амăртăвĕнче иккĕмĕш вырăн йышăннă. Çемье эстафетинче Трифоновсем çĕнтернĕ.