Красноармейский муниципальный округ Чувашской Республики Красноармейски муниципаллă округĕ
Яшукăн нумай турат несĕл йывăççи çинчен
Пулаççĕ вĕт пур енлĕ пултаруллă çынсем. Красноармейски салинчи Гурий Егорович Дубров шăпах çавăн пеккисенчен пĕри: темиçе çул тивĕçлĕ канура пулин те пĕр самант та пушă лармасть - художество пултарулăх коллективĕпе тăтăшах тĕрлĕ концертпа тухса çÿрет, сумлă тавра пĕлÿçĕ ятне тÿрре кăларса кĕнеке хыççăн кĕнеке калăплать. Хальтерех кăна авторăн «Пирĕн йăх-несĕлсем» ĕçĕ пичетленсе тухрĕ.
Тăванĕ-пĕтенне çичĕ сыпăкран малалла пĕлекен сахалтарах пулнăран, ентешĕмĕрĕн несĕл йывăççин «турачĕсемпе» тĕплĕ паллашрăм. Кам кăна çук унта: ял хуçалăх ĕçченĕ те, çар çынни те, вĕрентекен те… Сăмахран, Раççей Федерацийĕн тата Чăваш Республикин тава тивĕçлĕ артисчĕ Виталий Петров çак йăхранах иккен. Автор калашле, «шăпах çав йывăçăн пĕр туратти» Йăхри кашни çын çинчен питĕ тĕплĕ-уçăмлă çырса кăтартнă, тĕрлĕ çулти сăн ÿкерчĕксене вырăн панă кĕнекене алла илсен Чăваш халăх поэчĕн Ю.Сементерĕн сăмахĕсем аса килчĕç: «Типмест иккен ырă çăл куçсен сĕтекĕ, хăрамасть Яшук-юрăçăн несĕл йывăççин тымарĕ: вăл пире çĕнĕрен те çĕнĕ курăмлă пархатарпа сиплĕх-пехелĕх кÿрет».
"Хыпар"