ТРАК  Енре  иртнĕ  "Çавалпа  Шетмĕ  кĕввисем" саккармĕш  фестивале  хальхинче  Çĕрпÿ,  Красноармейски, Муркаш, Шупашкар, Элĕк, Иĕпреç, Вăрнар, Сĕнтĕрвăрри  тата  Канаш  районĕсенчи  юрă-ташă ăстисем, хăй тĕллĕн вĕреннĕ композиторсем хутшăннă.

Тăван  халăхăмăрăн  пултарулăхĕ  иксĕлми  пулнине тепĕр хут çирĕплетнĕ асăннă фестиваль. Унта хăй тĕллĕн  вĕреннĕ  36  композиторăн  74  хайлавĕ янăранă.  Шупашкар  районĕнчи  Иккассинчи  вăтам шкулта вĕрентекен А.Печников кĕвĕленĕ «Эсĕ манăн чĕрере"  юрра  жюри  ансамбльсем  валли  çырнă юрăсенчен чи лайăххи тесе йышăннă. Хор юррисен ушкăнĕнче  Красноармейски  районĕн  Енĕшкасси  ялĕнче пурăнакан В.Никандров пенсионер хывнă юрă çĕнтернё. Уйрăм юрăçсем валли çырнисенчен Красноармейски  салинчи  Ю.Шепилов юррине  палартнă.